دردشه مع الشباب فى الشارع المصرى

اسمحولى انى اتكلم معاكم فى الصفحه دى كلام من نوع خاص او بمعنى اصح دردشه من نوع خاص من القلب للقلب بدون تكليف وكمان باللغه العاميه العاديه حبيت اعمل الصفحه دى دردشه مع الشباب فى الشارع المصرى لان لازم نتكلم مع بعض ونشوف ايه اكتر حاجه بدايقنا فى حياتنا وايه المشاكل اللى ممكن نحلها مع بعض اكيد لان فكرنا متقارب هانلاقى حل لبعض او على الاقل نفكر ايه السبب فى اللى احنا فيه يمكن اللى اوحى ليا بالصفحه دى زميل ليا فى العمل لما عرف انى عامله مدونه بكلم فيها عن مشاكل الشباب قالى طب اسمعى مشكلتى واكتبيها اكيد فى ناس زيي كتير عندهم مشاكل ومفيش حد بيسمعهم جه الوقت اللى نهتم فيه ببعضنا احنا الشباب شباب المتستقبل .

وكان اول كلامى زميلى فى العمل 26 سنه .ان فى حاجات كتير اوى مدايقاه زى مثلا المواصلات والشوراع وزحمتها وكمان الضوضاء والتلوث الكبير اللى فى الهواء ، والغلاء ان الشباب مش عارفين يقوموا بمشروع الزواج بسبب العيشه والغلاء اللى احنا عايشينه وقال ان ازاى عايزانى بمبلغ بسيط اجيب شقه وكمان افتح بيت واسره من مجرد مرتب تفتكرى ان مرتبى بس هايكفى انى افتح البيت ده تفتكرى ان واحد زيى معوش عربيه هايصرف قد ايه وكام على المواصلات

وكان ردى طب ده اللى مدايقك من ناحيه الجواز ان الحاله الاقتصاديه مش مساعداك على الجواز خصوصا ان الجواز دلوقتى اصبح ماديات اكتر منه تفاهم كان رده كالتالى

ان حتى البنات اختلفت طباعها وان البنت ساعات هى اللى بتطلب من الولد الارتباط او انها تقوله انها بتحبه وعايزه ترتبط بيه وده شيئ اساسى بيجبر الشاب انه يبعد عنها لان اى شاب من وجه نظره ان المفروض هو اللى يبدأ .
من هى من وجه نظر اى شاب ان البنت بتتصف بالخجل والرقه والاحساس لكن ان الموضوع يصبح مطا رده فى كل مكان هو ده اللى صعب جدا لدرجه انى مصدقتش الكلام اللى بسمعه هل فعلا فى بنات هيا اللى بتطارد الشباب وكمان ممكن هى اللى تبدأ وتقوله صراحهً انت مرتبط او عايزه ارتبط بي

ياترى ياشباب ايه اللى غير مفهوم الدنيا بالشكل ده ؟ وهل الحريه ممكن تخلى البنت جريئه كده ولا مجرد كلام شبابيات عادى .ده غير ان منظور الشباب للبنات ان البنات المحترمه قليله جدا  ياترى البنات كمان شايفه ايه . وايه السبب ؟. وده اللى هاحكيه معاكم فى الموضوع اللى جاى ان شاء الله ياترى البنات شايفه ايه .

سألنا البنات وكان ردها كالاتى

احنا المره اللى فاتت عملنا دردشه جميله وساميناها كمان دردشه مع الشباب فى الشارع المصرىوحابه انقلكم اللى تم  من ناحيه البنات لكن لاقيت معظم البنات مش مقيده الفكره دى ان هى اللى بتبدأ بالارتباط وان البنت كرامه وماينفعش باى شكل من الاشكال انها تعرض على الشاب انها تربتبط بيه لازم انها تستنى لحد ماهو يفاتحها حتى لوكانت بتحبه ولو ماتقدمش ليها فى يوم من الايام يبقى نصيب وربنا مقدره

اما فى نوع تانى من البنات بتفضل انها تصارحه عشان تطمن وتتاكد انه مرتبط ولا لأ عشان ماتعيش فى الوهم لكن ارجع تانى واقول ان البنت هى مثال للرقه والرومانسيه وكمان كرامتها فوق كل شئ فالشباب مختلفه ممكن انسان يحبك ويراعى ربنا فيكى حتى لو انتى اللى فاتحتيه وفى شباب تانيه مش بتحب النوع ده من البنات اللى بتبدأ بالحب حتى ولو كان فى صالحه حبيبتى دايما الشاب يحب انه يتعب فى الشئ عشان يطمنله لكن لو جاله الشئ بسهوله ضاع بسهوله انتى جوهره غاليه يتمناها كتير من الناس اوعى تسيبى الشباب يتريقوا ويقولى هى اللى بتجرى ورايا والكلام ده انتى اكبر من كده وكمان يشكوا ان فى بنات مش محترمات لا طبعا فى محترمات كتييير اوى بس للاسف الحسنه بتخص والسيئه بتعم اتمنى لكم التوفيق وحياه افضل